TEGUCIGALPA, AP.- Polis militar a ehekutá un entrada hudisial den kas di e eks presidente Porfirio Lobo, desarmá seis bodyguard i a arestá su kasá, akusá di korupshon. Asina outoridat a informá.
Diferente polis den seis outo a drenta e kas den oranan di mardugá, pafó di e kapital i despues di dos ora a sali ku e eks promé dama Elena Bonilla i su kuñá Mauricio Mora. Ambos a wòrdu trasladá pa Ministerio Públiko, kaminda nan ta wòrdu interogá.
Polis no a indiká si Lobo tabata den su kas den pueblo di El Chimbo na e momentu ei, 10 kilometer na ost di Tegucigalpa.
“Awe ta un gran paso kontra inmunidat”, asina direktor di Konseho Nashonal Antikorupshon, Gabriela Castellanos a indiká via su kuenta di Twitter.
Castellanos i su ekipo a investigá e kaso di Bonilla pa dos aña i a presentá e evidensianan na fiskal.
Odur Fernandez, hefe di investigashon CNA, a bisa siman pasa den un rueda di prensa ku Bonilla a depositá 600.000 dòler di fondo públiko riba su kuenta di banko personal sinku dia promé ku su kasá a konkluí un periodo konstitushonal di kuater aña den yanüari 2014.
Ademas, el a informá ku e muhé, di 48 aña, no a hustifiká e destino di por lo ménos seis mion dòler ku e gobièrnu a entregá na e promé dama.
