LIMA, AP.- Kasi 20 tòn di droga konfiská na Perú desde febrüari i kual su destino prinsipal tabata Europa a keda kimá djaweps den un kuartel na Lima.
Esnan enkargá pa kima e droganan tabatin trahe di plata i hèlmunan spesial ku tabata protehá nan di kalor. E droga tabata empaketá den sakunan di plèstik i a wòrdu poné den un fòrnu gigantesko duná pa Merka.
“E droga tabata destiná pa hafnan internashonal”, segun e vise minister di Seguridat Públiko Nataly Ponce den un deklarashon kòrtiku. Di e total di e droga, kasi 12 tòn tabata di kokaina, sobra tabata mariwana i glor pa heroina.
Un informe anual resien di e agensia antidroga di Union Europeo a indiká ku e droganan di Suramérika aki, entre otro Perú, ta drenta e kontinente den kònteiner ku ta yega hafnan di Bèlgika, pero tambe di Spaña i Portugal.
Perú ta e segundo produktor mundial di kokaina i mayoria ta destiná pa Europa debí na e preis ku esaki ta wòrdu bendé einan kompará ku loke e produktornan ta haña na Merka. Asina e agensia antidroga merikano DEA a indiká.
