NEW YORK, MERKA, AFP.- Trump Organization a paresé den korte estatal di New York pa froude i evashon di impuesto. E èks presidente no ta personalmente embolbí den e kaso.
Riba su ret, Truth Social, Donald Trump a kritiká su atversarionan polítiko i e demókratanan i presidente Joe Biden pa kontinuá ku e “witch hunt” dos siman promé ku elekshon di medio mandato riba 8 di novèmber.
E huisio penal, ku a kuminsá djaluna ku selekshon di e hurado i ku posiblemente lo dura dos siman, ta resultado di un investigashon di fiskal di New York relashoná ku iregularidatnan riba kuentanan di empresanan desde 2005. Vários ehekutivo a haña kompensashonnan salarial ku nan a skonde pa belasting.
E èks direktor finansiero di Trump Organization, Allen Weisselberg” a deklará kulpabel pa 15 akusashon di froude i evashon di impuesto pa e suma di 1,76 mion dòler di entrada no deklará entre 2005 i 2021.
Segun e akusashon presentá riba 1e di yüli 2021, e tabata un di e ehekutivonan ku a haña gran parti di su entrada atraves di medionan indirekto i enkubrí.
