BEIRUT, LIBANO, AFP.- Líbano a atvertí djárason ku un brote di kólera a laga sinku morto i esaki ta “plamando rápidamente” den e pais, ku kasonan subiendo despues ku e malesa a plama for di Siria.
Líbano su promé kaso di kólera den vários dékada a kuminsá e siman aki. E pais ta luchando ku saneamentu defisiente i un infrastruktura na ruina despues di tres aña di krísis ekonómiko sin presedente.
“E epidemia ta ekstendiendo rápidamente na Líbano”, segun indikashon di e minister di salubridat, Firass Abiad na periodistanan.
Desde 6 di òktober, Líbano a reportá 169 kaso di kólera, kasi mitar di nan den e último dos dianan, inkluyendo sinku morto, segun e Ministerio di Salubridat.
Esaki a sosodé algun siman despues di un brote na Siria, kaminda mas di un dékada di guera a daña kasi dos tersero parti di un planta pa trata awa, mitar di tur brantwer aktivo i un tersera parti di torennan di awa, segun indikashon di Nashonnan Uní.
Abiad a bisa ku gran mayoria di e kasonan ta refugiadonan sirio, pero funshonarionan di salubridat a kuminsá nota un oumento di kasonan entre e libanesnan.
