WASHINGTON, AP.- Un korte federal na Washington a prohibí pa presidente Donald Trump kambia un polítika di gobièrnu tokante servisio militar di personanan transgenero.
E hues federal di distrito Colleen Kollar-Kotelly a disidí ku militarnan ku a demandá gobièrnu pa e kambio tabatin probabilidat di gana su kaso i a prohibí e gobièrnu di Trump pa reverti e kurso. El a ordená pa e polítika wòrdu establesé manera esaki tabata promé ku Trump a anunsiá e kambio durante verano.
Trump a ordená pa reverti e krudo di un polítika establesé promé ku yüni 2016. Ordu presidensial a prohibí personanan transgenero pa traha den forsa armá i transgeneronan ku ya tabata sirbiendo por wòrdu retirá debí na su identidat seksual. Promé ku esaki, eks presidente Barack Obama a kambia e lei pa permití transgeneronan pa partisipá.
E gobièrnu di Trump por apelá e diktamen di e hues, pero pa awor, e prohibishon no por drenta na vigor.
“Nos ta sinti enormemente aliviá pa nos demandantenan i otro transgeneronan den forsa armá”, segun Shannon Minter e abogado di Sentro Nashonal pa Derechi di Lesbiananan.
“Nan bida a wòrdu impaktá desde ku Trump a Tweet ku e ta bai restourá e prohibishon”, segun e abogado. “Awor nan por sirbi bou di stándarnan ekivalente manera kualkier otro persona”.
