QUITO, AP.- Presidente ekuatoriano Lenin Moreno a definí e fundadó di Wikileaks djaluna, komo un hacker i a bisa ku e no ta di akuerdo ku esaki. Apesar di a kritiká Julian Assange, el a agregá ku e por keda ku asilo den embahada di Ecuador na London.
Den un diálogo ku periodistanan den palasio di gobièrnu, Moreno a presisá ku e ta respetá “e kondishon ku Assange ta aden, e kondishon di respetá na su derechonan humano”. Sin embargo, Moreno a pidi Assange, pa e no duna komentarionan ni intervení den polítika interno di Ecuador òf di otro paisnan.
Ounke Assange tin kasi sinku aña bou di protekshon na e embahada, el a skibi djabièrnè riba su kuenta di Twitter: “ekuatorianonan ta wòrdu sigurá pero si WikiLeaks haña prueba di korupshon na Ecuador, lo publiká esaki”.
Assange, un eksperto oustraliano den informátika i fundadó di Wikileaks, ta referí òf hasi revelashonnan frekuentemente tokante asuntunan di polítika interno i eksterno di otro paisnan, spesialmente di Merka, loke a motivá e sede diplomátiko pa kòrta e servisio di internèt aña pasa.
Desde yüni 2012, na momentu ku Rafael Correa tabata presidente, Assange a drenta embahada di Ecuador na London pa evitá un pedido di ekstradishon pa Suesia pa akusashonnan di delitonan seksual. Fiskal a sera e proseso den su kontra.
