LA PAZ, AP.- Mas òf ménos 165 mil dòler pa persona ta e suma ku e linia aéreo LaMia ta ofresé komo pago na famianan di e 71 personanan ku a muri den e aksidente aéreo ku a sosodé na Colombia 16 dia pasá, asina e abogado di e kompania Nestor Higa a informá.
“E kompania ta hasiendo e trámitenan pa e famianan di e víktimanan risibí kada un 165 mil dòler”, asina Higa a splika den un rueda di prensa na su ofisina den e siudat di Santa Cruz na 400 kilometer di La Paz.
E abogado a splika ku LaMia ta konta ku un pólisa di seguro ku ta kontemplá pa e organisashon di aviashon sivil internashonal OACI tantu pa tripulantenan boliviano komo pa e pasaheronan, tur ekstranhero.
Despues di e aksidente dia 28 di novèmber poko promé ku el a yega e aeropuerto di Medellín, solamente a sobrebibí seis persona. E avion tabata transportá periodistanan, téknikonan i e ekipo di futbòl brasilero Chapecoense ku tabata bai hunga final na Copa Suramerikano.
Ta sospechá ku e kousa di e choke tabata falta di kombustibel ya komo e avion no a eksplotá ora el a mishi ku tera.
