BUENOS AIRES, AP.- E presidentenan di Argentina i Brasil, a reuní den e kapital aki i a purba trata e kaso di Venezuela den Mercosur i a indiká ku e gobièrnu karibense lo pèrdè su kondishon di sosio aktivo si pa promé di desèmber esaki no kumpli ku eksigensianan di e bloke.
E dos mandatarionan, di ideologia konservador, a tene un reunion den residensia presidensial di Olivos, pafó di Buenos Aires. Despues di esaki e presidentenan a bisa na periodistanan ku Argentina, Brasil, Uruguay i Paraguay ta mantené su postura uniformá ku e gobièrnu di Nicolás Maduro mester respetá un serie di prinsipio pa kontinuá komo sosio den union duanero.
Temer ta realisando un bishita ofisial na Argentina, desde kaminda e ta biaha pa Paraguay.
” Nos a duna un ‘deadline’ i si e pais no kumpli, e lo pèrdè su kondishon di miembro aktivo”. Asina Macri a bisa refiriendo na e fecha límite di promé di desèmber pa Venezuela promulgá leinan di derecho humano, entre otro.
E atministrashon di merkado Komun di Sur, aktualmente ta den man di delegadonan di Argentina, Brasil, Paraguay i Uruguay te ora Venezuela kumpli ku e rekisitonan pa mantené su miembresia. E pais karibense ta sostené presidensia temporal desde fin di yüli na momentu ku Uruguay a anunsiá e final di su periodo atministrativo.
