CARACAS, AP.- Presidente Nicolás Maduro a pidi Fiskal General i tribunal pa aktua kontra opositornan ku pidi akshon kontra Venezuela den eksterior.
Segun Maduro, e podernan públiko mester aktua ku man di heru kontra loke el a konsiderá komo un delito di “traishon na e patria”, pero e no a duna mas detaye.
Algun organisashon di derecho humano i kongresista opositor a pidi pa aktivá e Karta Demokrátiko Interamerikano pa Venezuela, pa enkarselamentu di mas di un sentenar di opositor i situashon kompliká ku e pueblo ta enfrentá pa e krísis ekonómiko i sosial.
Durante un konsentrashon na wèst di e kapital, Maduro a reiterá dilanti vários siguidó ku e ta dispuesto na tene “diálogo” i “rèspèt” ku gobièrnu di Donald Trump.
Sin kritiká e presidente merikano públikamente, Maduro a ekspresá ku e ta kontra un konstrukshon na muraya entre frontera ku México i ‘persekushon; i ‘kriminalisashon’ di migrantenan musulman.
