KIEV, UKRAINA, AFP.- E diputado i empresario ukraniano Viktor Medvedchuk hopi yegá na presidente ruso Vladimir Putin i ku a hui for di momentu ku e invashon a kuminsá na Ukrania, a keda kapturá den un operashon spesial, asina outoridatnan di Kiev a anunsiá.
“A tuma lugá un operashon spesial danki na SBU (e servisionan di seguridat ukraniano). Hopi bon”, asina presidente ukraniano Volodimir Zelenski a bisa riba Telegram.
E mandatario a publiká un potrèt kaminda ta mira e detenido, ku man di bui i bisti na unifòrm ukraniano. “Bo por ta un polítiko pro ruso i traha pa e estado agresor durante añanan. Bo por hui. Bo por usa asta unifòrm ukraniano pa tapa kos pero esei lo no stroba ku ta pone man riba bo. Esei lo no stroba bu skapa kastigu, asina e servisionan di seguridat ukraniano a bisa riba Telegram.
Medvedchuk di 67 aña tabata den aresto na su kas for di 2021 despues di a keda akusá di traishon haltu i di intento di sakeo di rekursonan natural di Crimea, península ukraniano den man di Rusia for di 2014.
