NOGALES, ARIZONA, MERKA, AP.- Si e proposishon wòrdu aprobá na Arizona, pronto lo tin algun tienda di mariwana na e sitio ku for di vários tempu tabata sentro di kontrabanda di droga.
Den siudatnan manera Nogales por mira kontrabandistanan kasi diariamente subiendo serunan ku un tas yen di mariwana.
E foko di e debate di Arizona ta kon e kartelnan di droga ta bai rospondé na e inisiativa di e legalisashon aki.
Lidernan di agensianan di òrdu ta bisa ku e kambio lo fortalesé e kartelnan, permitiendo nan infiltrá e merkado legal di mariwana i pushando nan pa bende droganan mas potente. E partidarionan di legalisashon ta bisa ku e kambio ta bai eliminá un sektor importante di e negoshinan aki.
Carlos Alfaro, supdirektor di e kampaña pa Proposishon 2015 ta bisa ku e legalisashon di e otro estadonan ya a sòru pa un kaida den konfiskashon di mariwana pa Patruyanan na Frontera.
For di aña 2011 te 2015, e kantidat di konfiská hasi pa agensianan den e pais a kai ku 39%.
Den sektor di Tucson, e konfiskashonnan a kai ku 28% segun statistik di Outoridat na Frontera.
Outoridatnan a konfiská kantidatnan grandi di mariwana na Arizona. Patruya na Frontera a konfiská kasi 363.000 kilo den e último aña fiskal den estado. 54 kilo mas a wòrdu konfiská na frontera den sektor di Tucson.
