BOGOTA, AP.- Mas di 1000 eks miembro di integrante di FARC lo wòrdu inkorporá komo eskolta pa e unidat sivil ku ta ofresé protekshon na kolombianonan.
Parlamento a aprobá ku un grupo di eks kombatiente di FARC ku a firma pas ku gobièrnu di Presidente Juan Manuel Santos por integrá Unidat Nashonal di Protekshon ku un salario di 600 dòler pa luna.
Te ainda, mas di 300 eks gueriero a postulá, di kual 53 di nan no a pasa prueba pa integrá e kuerpo aki, segun indikashon di Diego Mora, direktor di UNP.
Mora a indiká den un konferensia di prensa ku e eskoltanan nobo lo traha ku kordinashon interno di polis.
Na final di yüni mas di 7.000 gueriero di FARC a entregá nan arma na 467 opservador internashonal di Nashon Uní den 26 zona rural kaminda nan ta konsentrá den diferente parti di e pais.
FARC a anunsiá djaluna ku desde próksimo promé di sèptèmber lo kombertí e grupo den un movishon polítiko legal despues di keda mas di 50 aña den klandestinidat.
