BRASILIA, BRAZIL, AFP.- Mas di 5.600 persona a wòrdu desplasá for di nan kas i mas di 50 munisipio ta den situashon di emergensia dor di áwaseru fuerte i inundashonnan den estadonan brasilero Bahia i Minas Gerais, segun informashon di outoridatnan.
E regionnan mas afektá ta na sùit di Bahia, kaminda tin 3.700 persona desplasá i un total di 70.000 afektá, sinku morto i 175 herido, segun indikashon di Defensa Sivil di e region despues di kasi un siman di mal tempu.
E gobernador di Bahia, Rui Costa a deklará e situashon di emergensia den por lo ménos 30 munisipio.
Na nort di Minas Gerais, mas di 1.900 persona a wòrdu desplasá, segun Defensa Sivil. A deklará e situashon di emergensia den 31 munisipio.
Gobièrnu di Jair Bolsonaro a rekonosé e emergensia den 31 munisipio di Minas Gerais i 17 di Bahia pa asigná rekurso.
