BEIJING, AP.- China a konta 170 morto relashoná ku e vírus nobo, miéntras otro paisnan a sigui reportá mas infekshon. Vários estranhero a wòrdu evakuá di China pa regresá nan pais i hasi algun revishon médiko i karentena.
India i Filipina a detektá su promé kasonan. Ta trata di un biahero studiante ku a bishita Wuhan, e siudat sentral di China kaminda e vírus nobo a paresé pa promé biaha den desèmber. Sur Korea tambe a konfirmá ku a registrá un kaso di infekshon den e pais, i ta trata di un hòmber ku tabatin kontakto ku un pashènt identifiká anteriormente.
Tres kaso konfirmá na Hapon ta di e personanan ku e gobièrnu hapones a evakuá di Wuhan.
Merka a evakuá 195 siudadano di Wuhan, kual ta bou di opservashon den un base militar na sùit di California. Fransia, New Zealand, Oustralia, India, Singapur i algun pais mas tambe ta purbando di evakuá su siudadanonan di e pais. Taiwan, un repúblika di China kual ta konsiderá komo parti di su teritorio, tambe a pidi pa repatriá su siudadanonan desde Wuhan.
