PHILIPSBURG.- Mas personal di imigrashon na St. Maarten ta keda detené den e kaso di soborno i trafikashon di hende. E investigashon di e kaso aki tin e nòmber di “Ostrich” Ayera djárason mainta tempran a detené otro personal di imigrashon di inisial N.N.H. (33) nasé na Dominica.
N.N.H., un señora ta bira e di kuater ámtenar di imigrashon sospechoso ku ta kai sera den e kaso aki. E tres otronan tambe ta hende muhé.
Ayera ta hasi hustamente un siman ku a detené e abogado Brenda Brooks, sospechá di a soborná empleadonan di imigrashon i tambe di trafikashon di hende. Despues di tabata detené pa algun dia, a poné den libertat debí na kondishon di su salú.
E investigashon Ostrich a inisiá for di aprel 2016. Ta trata di un investigashon ku ta ser hasi dor di e unidat di trafikashon di hende di Kuerpo Polisial di St. Maarten, pa entrada ilegal di haitianonan, hamaikinonan i Guyanesnan.
Detenshonnan den e kaso aki a kuminsá kai for di 14 novèmber 2016 di e trahadó di inisial J.M. ku a keda detené. Ainda e J.M. ta detené. Su partner D.F. tambe a keda detené. Entre tantu a keda laga den libertat, pero ta keda sospechoso den e kaso.
Dia 17 di yanüari dos empleado di servisio di Imigrashon di St. Maarten a kai sera pa mesun akusashon esta trafikashon di hende. Ta trata dje trahadónan di inisial K.L.M.B. (34) i A.A.D. (33).
E trahadónan ta keda sospechá di trafikashon di hende, soborno i mal uso di nan profeshon komo personal di imigrashon. Tur personal di imigrashon ta detené ainda. Mirando ku detenshon ta kai, no ta ekskluí ku mas personal di imigrashon ta kai sera.
