RUMBEK, SUR SUDAN, AP.- E guera sivil ku ta tumando lugá den Sur Sudan a oumentá e kantidat di matrimonio infantil na nivelnan alarmante.
52% di mucha muhé den e pais ta kasa promé ku 18 aña, segun Nashon Uni. 17% ta kasa promé ku nan kumpli 15 aña di edat.
E añanan di konflikto a hasi e práktikanan aki mas pió, kaminda famianan ku ta pasa hamber ta mira nan yunan komo fuente di entrada. E pais mas hóben di mundu tin kuater aña den guera sivil, krímennan di guera i un pueblo ku ta sufri di hamber ku ta pone miónes di persona na riesgo.
Ounke kasamentu di menornan ta un práktika antiguo, e gobièrnu di Sur Sudan i agensianan di yudansa humanitario ta bisa ku e pobresa i falta di kuminda ta poniendo ku esaki ta prevalesé.
“E pueblo ta muriendo di hamber”, segun indikashon di Isaac Karkon, direktor di departamento humanitario di Sur Sudan den region di Rumbek. “Pues si bo tin un yu muhé, bo ta entrega esaki pa sobra famia por sobreviví”.
Na aña 2012, Eliza, di 13 aña, a wòrdu obligá pa kasa ku un hòmber di 35 aña a kambio di plaka. E hòmber tabata biba den e mesun vila.
“Si mi a ninga, mi tata i rumannan lo a mata mi”, asina Eliza a bisa.
