LONDON, REINO UNI, AFP.- E medidanan di distansia sosial pa para e propagashon di coronavirus kisas lo kontinuá pa vários luna mas, segun un ofisial di salú britániko a atvertí djárason. Ainda mundu ta purbando di haña un vakuna òf remedi ku ta evitá hende di muri dor di e vírus aki.
“Te ora nos haña esakinan, nos lo mester dependé di otro solushonnan manera medidanan sosial”, asina e ofisial di salú, Chris Whitty a bisa durante un konferensia di prensa.
E gobièrnu britániko ta eksperensiando preshon fuerte pa bini ku un splikashon tokante kon lo aliviá e medidanan di lockdown komo konsekuensia di COVID-19.
Pero e kantidat di morto lo sigui subi, i a yega 18.100 djárason. Esaki ta un oumento di 759 víktima kompará ku djamars.
E minister di eksterior Dominic Raab, kende ta fungiendo komo promé minister na lugá di Boris Johnson despues ku el a wòrdu hospitalisá ku e vírus, a atvertí ku por surgi un segundo ola di infekshon. “E rísiko di mas grandi ta ku si nos relahá e reglanan di distansia sosial muchu trempan, esaki por kousa un segundo ola di infekshon di COVID-19”, asina el a agregá. Whitty a bisa ku ta “kompletamente irealístiko” pa spera ku lo anulá e medidanan di lockdown pronto.
