WASHINGTON, AP.- Sekretario di defensa Jim Mattis a rospondé djadumingu na e provokashon nuklear mas resien di Norkorea ku un atvertensia fuerte. El a señalá ku Merka lo reakshoná na kualkier menasa norkoreano ku un “kontesta militar enorme”.
Den un deklarashon kòrtiku na prensa, Mattis a bisa ku e komunidat internashonal, den forma uni ta eksihí desnuklearisashon di e Península di Korea i ku e lider norkoreano, Kim Jong Un, mester sa ku e kompromiso di Washington ku Hapon i Sur Korea ta fuerte.
Kompañá pa general Joseph Dunford, Mattis a bisa: “Kualkier menasa di Merka òf su teritorio, inkluyendo Guam òf no aliadonan, ta akreedor pa un gran kontesta militar”. E palabranan aki a bira komun den kontestanan di Merka kontra agreshonnan Norkoreano.
Mattis no a rospondé na preguntanan di prensa, pero a señalá ku el a asistí un reunion di seguridat nashonal ku Trump un “grupo chikitu”.
El a komentá ku e presidente kier a wòrdu informá riba loke Mattis a deskribí komo “mayoria opshon militar” pa tuma akshon kontra Norkorea.
Norkorea a afirmá un prueba supteraneo di un bòm hidrógeno komo un “éksito perfekto”. Esaki ta potensialmente mas destruktivo ku un bòm atómiko. Esaki tabata e di seis prueba nuklear di Pyonyang desde 2006 i e promé desde ku Trump a asumí presidensia den yanüari último.
