LOS ANGELES, AP.- Fiskalnan general di 33 estado a pidi Kongreso pa aprobá un proposishon di lei pa habri porta na e sistema bankario di Merka pa e industria di mariwana legal.
Mayoria merikano ta biba den estadonan kaminda mariwana ta un produkto legal. Pero gran parti di e bankonan den e pais no ke tin nada di aber ku e plaka generá pa e industria di cannabis, pa miedu ku esaki por eksponé nan na un problema legal ku e gobièrnu federal, kual ta konsiderá mariwana komo ilegal.
“E falta di inkorporashon di e industria aki na nos sistema bankario ta dañando nos seguridat públiko i ekonomia”, asina e fiskal general di California, Xavier Becerra a bisa, kende su estado ta e tienda di mariwana legal mas grandi den e pais.
E konflikto entre e lei estatal i federal a krea un dilema legal pa mayoria produkto i bendedó den e industria floresiente aki, evitando ku nan ta haña akseso na servisionan finansiero manera un kuenta bankario òf un tarheta di krédito. Esaki a provoká ku mayoria negoshi ta operá solamente ku plaka kèsh, i mayoria biaha ta trata di sumanan grandi di plaka, oumentando e posibilidat pa atrako i ladronisia.
E proyekto di lei pendiente lo permití e negoshinan di mariwana pa haña akseso na fiansa, liñanan di krédito i otro servisionan bankario miéntras e institushonnan finansiero ta wòrdu protehá kontra akshonnan penal pa manehá plaka vinkulá ku mariwana.
