WASHINGTON, AP.- E gobièrnu merikano a apliká sanshonnan na mei sentenar di barku, empresa marítimo i empresanan komersial den su intenso mas resien pa oumentá e preshon riba Norkorea pa e desistí di su programa nuklear.
Presidente Donald Trump a bai mas leu, deklarando den un diskurso djabièrnè ku esaki tabata “e sanshon mas fuerte imponé kontra un pais”. Esaki a wòrdu pronunsiá djabièrnè den un Konferensia di Akshon Polítiko Konservador.
Ounke e kantidat di empresanan sanshoná, tantu di Norkorea komo otro nashonnan ta haltu, e impakto ekonómiko no tabata kla mesora.
Sinembargo, e medidanan nobo, ta enduresé e preshon kontra komersio di Norkorea signifikativamente. E sekretario di tesoro, Steven Mnuchin, a bisa na periodistanan ku Merka a imponé mas di 450 sanshon kontra e pais komunista. Mitar di esakinan a pasa den último aña, inkluyendo “práktikamente tur barku ku ta wòrdu usá aktualmente”.
Aña pasá, Konseho di Seguridat di Nashon Uní a imponé tres serie di sanshon kontra Norkorea pa priva esaki di entrada i rekursonan pa su desaroyo nuklear i di misilnan balístiko. E armanan aki ta representá un menasa emergente pa e teritorio kontinental di Merka. Washington ta partikularmente preokupá pa e eksportashonnan di karbon norkoreano ku tabata prohibí pa e sanshonnan di Nashon Uní i transferensianan di barku pa barku di petroli i produktonan di petroli importá.
