MIAMI, AP.- Merka a bai di akuerdo pa ekstraditá eks presidente panameño Ricardo Martinelli pa su pas, pa asina e enfrentá hustisia kontra akusashonnan di korupshon i spionahe.
“E sekretario di estado a tuma e desishon pa aseptá e ekstradishon”, asina Luis Eduardo Camacho, bosero di Martinelli a bisa na The Associated Press. “Nos ta prepará legal i polítikamente pa enfrentá esaki na Panamá”, asina el a ekspresá den un komunikashon via telefòn desde e nashon sentroamerikano aki.
E abogado di e eks presidente, Inna Shapavlov, a konfirmá tambe na AP ku e gobièrnu merikano a resolvé e ekstradishon.
Martinelli, desde den un prisòn federal di Miami desde un aña, a pidi Departamento di Estado pa rechasá e pedido di ekstradishon indikando ku e por wòrdu torturá si e wòrdu debolbé pa Panamá.
E pedido a wòrdu efektuá dia 15 di mei i e gobièrnu merikano tabatin 60 dia pa tuma un desishon.
Camacho a bisa ku Martinelli por wòrdu mandá su pais desde djaluna despues ku Merka i Panamá koordiná e detayenan.
Despues di yega Panamá, e mester presentá na outoridat hudisial i despues e mester wòrdu poné den libertat, segun indikashon di e bosero.
“Pero nos no sa kiko ta bai pasa. Esei ta un simpel teoria”, asina Camacho a agregá despues di splika ku Martinelli no tin òrdu di detenshon den su pais.
