WASHINTON, MERKA, AFP.- Merka a superá 200.000 morto di Corona vírus. Universidat Johns Hopkins ku sede na Baltimore a informá ku 200.182 merikano a muri i 6.86 mion a keda infektá ku e Corona vírus.
Merka tin e kantidat ofisial di morto mas haltu na mundu, dilanti di Brasil i India ku 137.272 i 88.935 morto.
E eks direktor di Sentro pa Prevenshon i Kontròl di Enfermedat (CDC), Tom Frieden a bisa ku COVID-19 ta e terser kousa prinsipal di morto e aña aki na Merka, mas ku tur aksidente, atake serebral òf Alzheimer.
Solamente kanser i enfermedatnan di kurason ta responsabel pa mas morto kompará ku COVID-19 den Merka den 2020.
Segun fuentenan ofisial, mas o ménos 5.300 persona a muri di Corona vírus na Merka den e último shete dianan ku a pasa.
Por lo ménos 6.000 pashènt ta interná den kuido intensivo i 1.500 mester di mashin di hala rosea, segun Covid Tracking Project.
