WASHINGTON, AP.- Un demanda federal presentá djárason den Merka ta sostené ku e práktika kresiente di gobièrnu di registrá laptop i telefòn na frontera ta antikonstitushonal paso e aparatonan elektróniko ta kontené informashon priva i di negoshi. E gobièrnu a bisa ku esakinan ta krusial pa defensa di e pais.
E di Kuater enmienda konstitushonal a prohibí konfiskashon no rasonabel i ta eksihí polis pa realisá esaki ku òrdu hudisial basá riba un kousa probabel. Sin embargo, korte a determiná eksepshon pa aeropuertonan i punto di entrada den Merka. Gobièrnu por realisá buskedanan sin òrdu hudisial pa apliká lei di inmigrashon, duana i protehá seguridat nashonal.
Den e mundu digital di awendia, tin buskedanan ku no mester wòrdu realisá sin òrdu hudisial, segun Fundashon Frontera Elektróniko i Union Merikano pa Derecho Sivil (ACLU). E demanda ta nombrá funshonarionan haltu di Departamento di Seguridat Nashonal i dos di nan dependensianan, esun di Duana i Protekshon na Frontera, Inmigrashon i Duana (ICE).
“Mayoria tin informashon importante, inkluyendo asuntu personal i di negoshi ekstremadamente sensibel, den nan telefòn, tablèt i laptop. Ta rasonabel pa nan tin esaki huntu ku nan na momentu ku nan biaha”. Esaki ta loke abogado di fundashon Sophia Cope a bisa. “A bira ora pa korte obligá gobièrnu pa stòp di trata frontera komo un lugá kaminda por evadí Konstitushon”.
Fundashon i ACLU a presentá su demanda den korte na Massachusetts na nòmber di 10 siudadano. Entre e demandantenan tin un artista, dos periodista, un shofùr di limuzin, dos studiante, un profesor universitario, empresario, programador di kòmpiuter i un ingeniero di NASA.
Tur ta hendenan kaminda agentenan di frontera a registrá nan aparato elektróniko na momentu ku nan a drenta di biahe eksterior, segun e demanda. Ningun a wòrdu akusá di delito. E agentenan a konfiská e aparatonan i a konservá esaki durante vários siman òf asta luna. Un di e ophetonan, konfiská den yanüari, no a wòrdu debolbé.
