CARACAS, AP.- Merka, Reino Uní, Alemania, Spaña i Grupo di Lima, integrá pa 14 pais di e region, a lanta nan bos kontra elekshon kaminda presidente Nicolás Maduro a logra reelekshon. Esaki ta empeorá e relashon di Venezuela i otro nashonnan mas ainda i por hinka e pais suramerikano den un aislamentu internashonal muchu mas grandi.
Maduro ta enfrentá krítikanan meimei di un krísis ekonómiko kompliká i sosial ku por bira pió despues ku Merka a pone mas sanshon i un akshon similar ku Union Europeo por tuma.
Argentina, Brasil, Canada, Chile, Colombia, Costa Rica, Guatemala, Guyana, Hondúras, Mexico, Panamá, Paraguay, Perú i Saint Lucia a disidí pa redusí e nivel di nan relashonnan diplomátiko, organisá konsulta ku nan embahadornan i organisá un enkuentro ku embahadornan venezolano den nan pais pa ekspresá e protesta pa e proseso elektoral, indikando ku esaki “no ta kumpli ku a stándarnan internashonal di un proseso demokrátiko, liber, hustu, i transparente”, asina un komunikado di e bloke a señalá.
E grupo a indiká vários siman pasá kaba ku nan lo no rekonosé e legitimidat di e proseso elektoral den un intento pa purba para e elekshon, loke Maduro a deskartá di forma reiterá apesar di atvertensianan di Merka i Union Europeo.
