WASHINGTON, AP.- E sekretario di Salú i Servisio Humano di Merka, Alex Azar, a bisa djamars ku ainda su departamento tin kustodia di 2.047 mucha inmigrante ku a wòrdu separá di nan mayornan debí na e polítika di e gobièrnu di Donald Trump, kual ta wòrdu yamá “sero toleransia” na frontera ku Mexico.
Esaki ta apénas seis ménos ku e 2.053 muchanan ku e departamento a bisa ku ta bou di su kustodia te djárason siman pasá. Azar a bisa ku otro muchanan a wòrdu entrega na kustodia di departamento desde siman pasá.
Senadornan demókrata ku tabata interogá Azar den un oudiensia di e pènel di finansa a bisa ku e avansenan no tabata sufisiente.
“E departamentonan di Salú, Seguridat Nashonal i Hustisia ta parse di ta hasiendo muchu mas pa oumentá e kaso i tira falta riba otro ku nan ta hasiendo algu pa bisa e mayornan unda nan yunan ta”, asina e senador demókrata Ron Wyden a bisa.
Azar a bisa ku e ta mará na un lei federal ku ta bisa ku e muchanan no por keda mas di 20 dia detené ku nan mayornan pa outoridat di inmigrashon. Sinembargo, abogadonan di e inmigrantenan ta bisa ku e gobièrnu por superá barera aki lagando e mayornan temporalmente den libertat miéntras nan kousa di asilo ta wòrdu prosesá.
Un dokumento publiká djasabra pa Departamento di Salú a bisa ku Ofisina di Duana i Protekshon na Frontera a reuní 522 mucha ku nan mayornan. Sinembargo, no ta evidente si esaki ta referí na un otro grupo di mucha, kende no a wòrdu entregá na e departamento pa pone nan den un refugio.
