ISLAMABAD, PAKISTAN, AP.- Merka i Taliban a kuminsá ku un seshon mas di negosiashon di pas djasabra na Qatar, algun dia despues ku e sekretario di Estado, Mike Pompeo, a bisa ku Washington ta spera ku por sera un akuerdo di pas ku e afganonan promé ku 1e di sèptèmber.
E bosero di Taliban, Zabihullah Mujahid, a konfirmá na The Associated Press ku e negosiashonnan a kuminsá kaba. E reunion tabata programá pa kuminsá mainta, pero esaki a start mèrdia pa di shete biaha den un serie di negosiashon ku a kuminsá aña pasá despues ku a designá un representante merikano, Zalmay Khalilzad, pa e proseso.
Ambos parti a bisa ku a yega na un entendimentu tokante e retiro i garantianan di e grupo Taliban, kual ta e enfoke di e reunionnan aki. Ainda mester traha riba e detayenan.
Taliban a rechasá di reuní direktamente ku e gobièrnu di presidente Ashraf Ghani. Pero e grupo a reuní vários biaha ku funshonarionan importante di Afganistan na Kabul, inkluyendo eks presidente Hamid Karzai, vários lider opositor importante i miembronan di e konseho di pas di gobièrnu. E reunionnan aki a tuma lugá na Moscow na komienso di aña.
