WASHINGTON, AP.- Merka lo manda kasi 3.000 sòldat mas medio Oriente, despues di e atake ku a kobra bida di general Qassem Soleimani, segun revelashon di funshonarionan di Pentágono djabièrnè.
E funshonarionan di Defensa, kende a papia ku kondishon pa keda anónimo pa revelá un desishon ku no a wòrdu anunsiá ofisialmente pa Pentágono, a bisa ku e sòldatnan ta di e divishon di North Carolina.
E sòldatnan aki lo uni e 700 elementonan di e mesun divishon ku a wòrdu desplegá pa Kuwait algun dia pasa, despues di algun insidente kontra e edifisio di Merka su embahada na Baghdad di parti di milisianonan respaldá pa Iran i su simpatisadónan.
Trump a bisa ku Soleimani ta responsabel pa asesiná i heridá diferente merikano i hopi mas den e region.
Merka i Iran a kuminsá ku konfrontashonnan kada biaha mas kresiente, desde ku Trump a saka Merka for di e pakto nuklear na aña 2015 i imponé sanshonnan devastador kontra Tehran.
Merka a pidi su siudadanonan pa sali for di Irak “inmediatamente”, oumentando miedu ku e atake i kualkier represaya di Iran por kousa un konflikto internashonal den e region.
E sekretario di Estado, Mike Pompeo, a defendé e atake komo “totalmente legal” i a bisa ku Soleimani tabata un menasa “inminente” kontra Merka i su interesnan den e region.
