HOMESTEAD, FLORIDA, MERKA, AP.- E senador federal Bill Nelson a akusá e gobièrnu di Donald Trump djamars di “enkubrimentu” despues ku el a wòrdu ningá pa drenta un sentro di detenshon pa muchanan migrante na sùit di Florida.
Nelson i e kongresista Debbie Wasserman Schultz, ámbos demókrata di Florida, a bishitá e refugio Temporal di Homestead pa Menornan no kompañá despues di reportá ku algun mucha migrante a yega einan.
Wasserman Schultz a bisa ku tabatin 1.100 mucha den e instalashon, di entre 13 i 17 aña, kua komo menor no kompañá, inkluyendo muchanan separá di nan mayornan òf famia na frontera. El a agregá ku den e zona tin dos otro sentro mas ku muchanan menor di edat.
E polítikanan migratorio di Trump a wòrdu kritiká despues di indikashonnan ku mayor i muchanan migrante ta wòrdu separá na frontera ku Mexico. Demókratanan i algun republikano ta pidiendo pa pone fin na e práktika aki.
Nelson a bisa ku e supsekretario di departamento di Salú i Servisio Humano, Eric Hargan, a informe ku e proseso pa haña pèrmit pa drenta lo tuma dos siman.
“Mi ta kere ku loke nan ta hasiendo ta un enkubrimentu na fabor di e presidente”, asina Nelson a bisa.
