NEW YORK, AP.- Sentenar di famia di víktimanan, sobrebibiente i reskatistanan a reuní World Trade Center djaluna pa rekordá 16 aña di atakenan terorista mas mortal riba suela merikano. Akinan mas o ménos 3.000 persona a pèrdè nan bida.
Entre nan tabatin Rob Fazio, kende tur aña ta akudí e sitio na New York aki kaminda su tata a fayesé. “Mi lo keda bini aki pa restu di mi bida”, asina Fazio a bisa. “Di aki mi ta saka mi forsa”.
Mas o ménos mil persona a reuní na momentu ku e seremonia a kuminsá ku un momentu di silensio, miéntras por a skucha kampana zona den fondo. Despues di esaki, e nòmber di e víktimanan a kuminsá wòrdu lesá. Ta trata di nòmber di esnan ku a muri na momentu ku e avionnan terorista sekuestrá a dal den dos edifisio di World Trade Center, Pentágono i un kampo na Pennsylvania.
Algun no por kere ku ya 16 aña di tragedia a pasa. “E ta sinti manera ta ayera tur kos a pasa.
Pa otronan, esaki tabata un momentu pa gradisí ekiponan di reskate i militar, inkluyendo pa manifestá preokupashon pa esnan afektá pa Irma.
Donald Trump, a enkabesá su promé aniversario di atentadonan aki komo presidente i a partisipá den un minüt di silensio na momentu ku e promé avion a dal. E tabata kompañá pa promé dama Melania Trump.