WASHINGTON, MERKA, AFP.- Merka a anunsiá ku e ta prohibí visa na tur funshonario di Sudan aktual i anterior, ku ta opstakulisá e transishon demokrátiko, ku e fin di fomentá negosiashonnan di un akuerdo entre sivil i militarnan, inkluyendo un promé konvenio marko firmá djaluna pa sali di e krísis.
“Ora a haña sa di kon frágil e transishon demokrátiko ta, Merka a responsabilisá esnan sea militar òf polítiko, ku trata di retrasá e progreso pa demokrasia”, segun sekretario di estado merikano Antony Blinken den un komunikado.
E prohibishon tambe ta apliká na famia di esnan direktamente envolví ku e funshonarionan òf eks funshonarionan sudanes riba kendenan a medida ta dirigí i kual lista a keda fasilitá pa diplomasia merikano.
Merka ta amplia asina e restrikshonnan di visa ya imponé durante e promé fase di transishon demokrátiko na Sudan. Blinken tambe a ekspresá e apoyo merikano na e akuerdo ku a yega na dje entre sivil i sòldánan sudanes pa pone fin na e krísis, ku algun manifestante na fabor di demokrasia ta konsiderá demasiado vago i ku ta establesé poko plaso pa e transmishon efektivo di poder for di despues di e gòlpi di estado na òktober 2021.
