WASHINGTON, AP.- Gobièrnu federal tin sufisiente sèn pa manehá loke Harvey ta kousando na Texas, pero e tormenta ta rekerí yudansa multimionario. Pues meskos ku Katirna i Sandy a eksihí.
E fondo di agensia federal pa Maneho di Emergensia di Merka, FEMA, tin mas di 3.000 mion dòler.
Un inyekshon di plaka di FEMA lo wòrdu rekerí pronto debí na e magnitut di e tormenta. Kongreso ta dispuesto na agregá un pakete di yudansa na un lei di gastu temporal pa prevení ku gobièrnu ta paralisá promé di òktober.
Kasi sigur Harvey lo mester di un gran plan di rekuperashon, inkluyendo manera Katrina i Sandy a rekerí; sin embargo, ainda ta pronto pa determiná kuantu sèn ta nesesario, ya ku e inundashonnan ainda ta subiendo na Houston.
Gobièrnu federal a indiká ku Texas ta bai haña loke e mester.
“Loke boso lo bai mira ta ku gobièrnu federal i posiblemente Kongreso, lo pone rekursonan na disposishon pa Texas”, asina visepresidente Mike Pence a bisa na un stashon di radio di Houston djaluna
Pence a agregá ku debí na e “magnitut di e inundashonnan” den e área “lo tuma vários aña pa tur kos regresá na normalidat”. El a bisa ku 22.000 persona ya a pidi yudansa federal i ku mei mion persona na Texas ta kumpli ku e rekisitonan pa pidi yudansa finansiero pa desaster”, asina el a agregá.
HARVEY TA HAÑA UN TIKI FORSA
Sentro Nashonal di orkan a señalá ku Harvey a rekuperá un tiki forsa djaluna despues di drenta den awanan kayente di Golfo di México.
E orkan ta registrando bientunan máksimo sostené di 72 kilometer pa ora, un oumento di 8 kilometer pa ora.
Harvey posiblemente lo keda riba awa ku bientu di 72 kilometer pa ora, durante 36 ora i despues subi tera bèk na ost di Houston. E pronóstiko ta indiká ku unabes e ta riba tera, e tormenta lo move na nort te ora e pèrdè su forsa di tormenta tropikal despues su katerkoristika na tropikal.
Harvey a mishi ku tera na Texas djabièrnè anochi komo orkan kategoria kuater.
Un muhé a muri den área di Houston despues ku un palu grandi a kai riba su kas debí na áwaseru fuerte di tormento Harvey. Asina outoridat a indiká.
Posiblemente un total di seis persona a pèrdè nan bida te ainda.
