SIUDAT DI MEXICO, AP.- Kámara di Diputado mehikano a aprobá e presupuesto federal pa 2020 den un seshon den kapital di e pais, despues di un serie di konsentrashon i blokeo di gruponan kampesino alrededor di e sede di Kongreso.
E manifestantenan ta protesta kontra presidente Andres Manuel Lopez Obrador su medida pa entrega fondo direktamente na kampesinonan i famianan pober na lugá di distribuí esaki atraves di organisashonnan ku por representá e gruponan aki.
Partido Morena di Lopez Obrador a opta pa hasi e transakshonnan direktamente i ofresé supsidio agríkola tambe.
E presupuesto federal di 315.000 mion dòler ta inkluí ekonomisashon di fondo ku mester keda distribuí entre pa Instituto Nashonal Elektoral (INE) i Instituto Nashonal di Akseso na Informashon (INAI). Esnan ku ta oponé kontra e proposishon a indiká ku e medidanan di ekonomisashon ta difikultá e proseso pa realisá elekshon di forma demokrátiko, hustu i konfiabel.
