MIAMI, AP.- Un bankero ku tabata sirbi multimionarionan venezolano a wòrdu kondená na dies aña di prisòn na Miami. El a partisipá den e labamentu di 1.200 mion dòler di e kompania estatal di petroli PDVSA. E kaso a impliká yu di kriansa di presidente Nicolás Maduro.
Matthias Krull ta koperando ku e gobièrnu merikano i hues federal Cecilia Altonaga a bisa ku su kondena por wòrdu redusí.
E eks bankero di Julius Baer, kende a nase na Alemania, krese na Caracas i biba na Panama mester paga 50.000 dòler na but i debolbé 600.000 dòler ku el a haña di benefisio pa su partisipashon den e konspirashon kaminda el e retirá fondonan di PDVSA atraves di kontraktnan froudulento i préstamonan na Bolívar riba e merkado ilegal.
Krull, di 45 aña, lo keda den libertat te 29 di aprel 2019.
Ta trata di e kaso mas grandi di labamentu di plaka kontra funshonarionan venezolano i su sosionan. E investigashon ta parti di un esfuerso di fiskalnan merikano pa kita Maduro di su puesto. Te ainda el a ninga tur akusashon di korupshon ku a kai riba vários funshonario di rango haltu den e gobièrnu venezolano.
