SAO PAULO, AP.- Den su promé deklarashonnan komo presidente elekto di Brasil, Jair Bolsonaro a primintí di defendé Konstitushon i uni e pueblo ku ta profundamente dividí aktualmente.
Gruponan defensor di derechi humano a atvertí riba un posibel retroseso den libertat di sivilnan.
Bolsonaro a bisa ku e lo “pasifiká” Brasil despues di e periodo di elekshon ku a revelá divishon profundo den e nashon. E propio kandidato a wòrdu propiná un hinká den un akto di kampaña den sèptèmber. Ademas, tabatin vários kaso di violensia debí na kuestionnan polítiko, spesialmente kontra e komunidat homoseksual.
Meskos ku otro dignatarionan ku a asumí poder den diferente parti di mundu, Bolsonaro a konstruí su popularidat ku un meskla di komentario skandaloso i ofensivo. Meskos ku otronan, e lo enfrentá un rechaso fuerte di gruponan preokupá ku su opinionnan ta kousa un menasa kontra institushonnan demokrátiko.
Bolsonaro a menospresiá hende muhé, koló skur i e komunidat gay; el a elogiá tortura i asesinato di parti di polis i a bisa ku e lo invitá militarnan pa forma parti di su gabinete.
