GINEBRA, AP.- Microsoft a anunsiá djamars ku esaki lo duna 5 mion dòler na Ofisina di Nashon Uní pa Derechi Humano durante sinku aña. Esaki ta un kontribushon ku e organismo mundial a kalifiká komo “asosiashon históriko” ku por inspirá otro empresanan privá di hasi meskos.
E empresa teknológiko ku sede na Redmond, estado di Washington, a anunsiá ku lo desaroyá i usa teknologia pa yuda e filial di Nashon Uní aki pa “predesí, analisá i rospondé” na situashonnan kritiká di derechi humano na momentu di masakre, violashon i detenshon sin huisio rònt mundu.
“Manera empresanan lokal ku ta mira e problemanan ku mundu tin, nos ta kere ku nos tin e responsabilidat di yuda resolvé esakinan”, asina Bras Smith a deklará, kende ta presidente di Microsoft.
E asosiashon a wòrdu inisiá sin gran anunsio siman pasá. Ravina Shamdasani, bosero di e agensia mundial ku tin su sede na Ginebra, a bisa ku esaki ta reflehá e uso di teknologia pa promové e derechinan humano i rekonosimentu di e ròl ku sektor privá por tin den e kousa aki.
Un ehèmpel di teknologianan nobo ku ta wòrdu desaroyá aki ta un programa yamá Rights View ku ta permití pa suma datonan tokante violashon di derechinan humano.
