BEIJING, CHINA, AFP.- Míles di persona a wòrdu evakuá na sùit di China i na Vietnam djaluna, kaminda desénas di biahe a wòrdu kanselá, debí na yegada di un siklon, segun outoridatnan lokal.
E atministrashon meteorológiko di China a konfirmá ku e siklon Talim a mishi ku tera riba kosta di provinsia Guangdong pa binti pasa di diesun di anochi (14H20 GMT).
Segun e mesun ofisina aki, ta pronostiká bientu fuerte i áwaseru torensial djaluna anochi na kosta desde Guangdong te Hainan.
A emití un alerta oraño, ku ta e di dos mas haltu riba un eskala di kuater.
E tormenta lo mester pèrdè forsa pa awe mainta i “debilitá i sigui na nort di Vietnam” djárason.
Segun e sientífikonan, por spera ku siklonnan ta sigui bira mas fuerte dor di kalentamentu global.
Por lo ménos 1.000 persona a wòrdu evakuá pa siudat di Yunfu, den provinsia Guangdong, segun e korant Southern Daily.
Mayoria bus no ta sirkulá mas den siudat i mas ku 1.000 pasahero a keda afektá pa kanselashonnan i retrasonan di buelo, segun outoridat di aeropuerto di Hong Kong.
Aeropuerto di Macao a kanselá 80 vuelo.
A pidi barkunan pa regresá nan hafnan rápidamente, ya ku por spera olanan di te ku 6 meter haltu.