MOSCOW, RUSIA, AFP.- Presidente ruso, Vladimir Putin, a pidi djaluna pa reforsá medidanan di seguridat riba e brùg di Crimea, un infrastruktura stratégiko destrosá pa di dos biaha debí na un atake ukraniano.
“Teniendo na kuenta ku ta trata di e di dos akto terorista riba e brùg di Crimea, mi ta spera proposishonnan konkreto pa mehorá seguridat di e infrastruktura di transporte importante i stratégiko aki”, asina Putin a deklará durante un reunion gubernamental transmití na televishon.
E dirigente ruso a indiká ku un mucha muhé a resultá heridá i su mayornan a muri den e atake ku a tuma lugá kontra e brùg ku ta konektá Rusia ku e península di Crimea, aneksá na 2014.
“Klaramente Rusia lo reakshoná riba esaki. Ministerio di Defensa ta preparando riba proposishonnan adekuá”, asina el a bisa.
E atake a kousa dañonan importante riba kaminda di e brùg di 18 kilometer ku ta wòrdu usá pa manda suministro pa ehérsito ruso na Ukrania.
Un fuente di servisionan di seguridat ukraniano (SBU) a sigurá na AFP ku e atake a wòrdu ehekutá pa servisionan spesial i forsa naval di Kiev ku a usa “dronenan naval”.
Esaki ta un “akto terorista nobo di e régimen di Kiev”, asina Putin a insistí.
