MEXICO, MEXICO, AFP.- Míles di mehikano a protestá djadumingu kontra un reforma di e órgano elektoral aprobá pa ofisialismo den Kongreso, un kambio ku segun su oponentenan ta kontra di e sistema demokrátiko.
Un multitut bistí na blanku i ros a yena gran parti di e plasa públiko prinsipal di e pais i vários kaya mas den e sentro históriko den Siudat di Mexico.
E reforma ta redusí e personal i presupuesto di Instituto Nashonal Elektoral, e entidat enkargá ku organisá elekshon i kual e presidente iskierdista di e pais Manuel Lopez Obrador ta akusá di ta kosta hopi plaka i di a tolerá froude den pasado.
E manifestashon a keda organisá pa vários organisashon polítiko i sivil den e Frente Síviko Nashonal.
Ni outoridatnan ni e organisadónan no a informá di e kantidat di persona ku a partisipá den e protestanan, ku a tuma lugá den vários siudat di e pais, manera Guadalajara.
Lopez Obrador a kritiká e protesta, señalando ku tras di esaki tin un grupo di korupto ku ke yega na poder bèk pa sigui hòrta.