Update: Gastu 72 mil florin pa konekta generator kua kosta 78 mil florin
Ministerio di finansa a risibi un deklarashon di Betesda dia 28 di febrüari último. Sinembargo den e nota di splikashon tin sumanan ku ta parse ekstremadamente haltu. Tur esakinan ta gastunan ku e instituto a a hasi for di e suma di 2.013.000 florin ku Betesda a haña na supsidio adishonal.
Minister di finansa den un karta na Betesda ta pidi informashon adishonal riba e pago na diferente kompania pa sumanan relativamente haltu. Algun di nan ku ta hala atenshon ta e trabou ku un ‘handy man’ a hasi pa konektá e generator. E generator ta kosta Fl 78.000.- anto e handy man a kobra Fl 72.000 pa konekt’é. A kumpra Fl 21.000 na fèn. Aki ta paresé dos kompra di èrko, unu pa 120.000 na un kompania ku ta bende artíkulonan pa kas e.o èrko i un di dos pa 160.000 na e agensia di biahe.
E minister ta pidi pa haña faktura ku ta duna prueba di e kompranan menshoná i ta pidi pa spesifiká kiko ta pagá kaba i kiko mester paga ainda. Tambe ta pidi pa hasi korekshon na posibel erornan den e lista i pone kantidat di merkansia ku a kumpra. Tambe ta pidi Betesda pa spesifiká kua ta gastu di mantenshon i kiko ta gastu di kompra di material. Betesda tin te 15 di mart pa duna kontesta.
Betesda a kumpra 160.000 florin na èrko na Maduro Travel
WILLEMSTAD.-Minister Javier Silvania awe mainta a publiká ku e ta pidiendo informashon detayá di e instituto di kuido Betesda riba e uso di e mas di 2 mion florin ku Betesda a haña na supsidio adishonal. Manera EXTRA a informa anteriormente, tin algun dia kaba ku a surgi un situashon na momentu ku minister di Finansa ta eksigiendo pa Betesda duna kuenta di rason kiko nan ta hasiendo ku e plaka ku nan a risibi adishonal. Awe e minister ta indiká ku Betesda lo a informa ku a kumpra 160.000 florin na èrko i ku a kumpra esei na e agensia di biahe Maduro Travel. Minister Silvania ta pidiendo splikashon.
Den un komentario aklaratorio e minister ta bisa ku Betesda a indiká ku nan ta den un situashon urgente debí ku sèn no ta yega pa kumpli ku kuido na drechi i den e kuadro ei e minister di finansa a hasi esfuerso i e instituto a haña un supsidio adishonal di algu mas ku 2 mion florin. Pero e suma aki ta mara na kondishonnan estrikto e.o ku mester usa e sèn solamente pa e puntonan ku e dekreto ministerial ta indiká.
E dekreto ta indiká bèrdat ku mester usa e sèn pa kumpra un vehíkulo pa transporte, hasi mantenshon di e edifisio i kumpra material nesesario i urgente. Den su komentario ta bisa ku e ke haña splikashon pasobra ta plaka di pueblo a usa pa duna Betesda ademas kompra di 160.000 florin na èrko anto na un agensia di biahe ta lanta pregunta. E minister a bisa ku e ke mira e faktura pa e èrkonan i tambe e lo manda hende bai wak kua èrko a kosta 160.000 florin.
EXTRA a buska kontakto ku gerensia di e agensia di biahe riba e partikularidat aki i ta pendiente reakshon di e kompania.
