CIUDAD DE MEXICO, MEXICO (AFP).- Sigur 18 persona migrante di Venezuela i Haiti a muri ayera den un aksidente di tráfiko den e estado mehikano di Oaxaca, ku a laga 27 hende leshoná. Tur ta di orígen venezolano i haitiano.
E aksidente a tuma lugá alrededor di 5 or di mardugá, ora ku e bùs den kua e estranheronan tabata biaha a pèrdè kontròl i a bòltu riba e kaminda ku ta uni e siudatnan di Oaxaca i Cuacnopalan.
“Por bisa tambe ku tin sigur 27 persona leshoná i nan a keda trasladá pa hospitalnan serkano pa haña atenshon médiko”, segun e komunikado ta agregá.
E tragedia a tuma lugá apénas sinku dia despues di otro aksidente den e estado di Chiapas, kousando morto di 10 kubano ku tabata biaha di forma klandestino den un trùk di karga.
Dia 28 di sèptèmber otro dos migrante a pèrdè nan bida ora ku nan trùk a bòltu den e munisipio di Mezcalapa.
E aña’ki mes tambe, den febrüari, entre e estadonan di Puebla i Oaxaca tabatin un aksidente ku 17 morto i 15 hende leshon, tur migrantenan di Venezuela i Colombia.
