NASHON UNI, MERKA, AFP.- Mayoria yihad ku a ehekutá un masakre den Burkina Faso na komienso di luna tabata mucha, segun deklarashon di e embahador di Merka den Nashon Uní, pidiendo pa aktua kontra uso di mucha den guera.
“E muchanan aki ta wòrdu violá i obligá pa asesiná nan propio rumannan i mayornan. Mayoria biaha nan no ta ni mas haltu ku e arma ku nan mester karga. Ta siña nan kometé krímen promé ku siña nan kuminsá konta”, segun indikashon di e embahador di Merka den Nashon Uní, Linda Thomas-Greenfield, den un videokonferensia ku vários mandatario.
Un grupo arma a mata por lo ménos 132 persona den diferente atake anochi na Solhan, un pueblo pober den region di Sahel, serka di frontera ku Mali i Niger. Esaki ta un di e atakenan mas mortal di violensia islamita den e pais desde 2015. Fuentenan lokal a bisa ku e sifra a oumentá na 160 morto, inkluyendo 20 mucha.
E grupo armá tabata muchanan di entre 12 i 14 aña, segun indikashon di Thomas-Greenfield den un konferensia di prensa. E bosero di gobièrnu di Burkina Faso, Ousseni Tamboura a bisa siman pasa ku tabatin muchanan embolbí den e atake, pero e no a detayá ku gran parti di e grupo tabata konsistí di mucha.
