FREETOWN, SIERRA LEONE, AP.- Entre lágrima, Hawa Stevens, a papia tokante e 28 miembronan di su famia ku a fayesé despues di e deslave i inundashonnan ku a asotá Freetown i kobra bida di sentenar di persona.
“Mi mama, tata, rumannan, primunan, tur a muri. Mi bida a wòrdu destrosá. Dios yuda mi por fabor”, esaki ta loke el a bisa pafó di e mortuario di e siudat kaminda el a akudí pa purba identifiká e kadavernan di su sernan kerí.
Stevens tabata rondoná pa sentenar di persona, algun ku máskara pa evitá di inhalá e holó di morto.
Pa Stevens, e wardamentu aki a trese desepshon huntu kuné. “Mi por a identifiká dos persona so di mi famia kompleto”, asina el a bisa.
E morto di mas di 300 persona a wòrdu konfirmá, un terser di kual ta menornan di edat, despues di e avalanchanan devastador ku a asotá e siudat djaluna mardugá. Funshonarionan di Krus Kòrá a kalkulá ku 600 persona tabata pèrdí, 48 ora despues di e desaster, kual a wòrdu registrá na momentu ku mayoria tabata drumí. Míles a pèrdè nan kas.
Djárason, ekiponan di reskate a sigui traha pa saka e kadavernan entre tonelada di lodo i shushi ku a baha riba zonanan pober di Freetown. Mayoria tabata voluntarionan kende tabata koba. Na algun okashon esaki tabata pasa ku nan propio man.
