BOGOTA, AP.- E lei di amnistia aprobá den desèmber na Colombia pa aktornan di e konflikto armá ku gueria di FARC no ta kumpli ku standardnan internashonal i no ta garantisá derechonan fundamental di e víktimanan. Asina e informe anual di Nashon Uní a indiká riba derecho humano den e pais na 2016.
E Komishonado pa Nashon Uní a bisa ku e ta “sumamente preokupá” pasó e lei ta laga sierto ambigwedat i bashí ku “por faboresé e imunidat pa kriminalnan di violashon di derecho humano grave”.
E hustisia tradishonal, ku un gran oposishon interno, ta un di e puntonan mas polémiko di e akuerdo di pas entre gobièrnu i FARC. E pakto ta establesé un amnistia generalisá i kondenanan di te ku ocho aña di prizòn pa e kombatientenan ku a partisipá den krímennan grave si na atmití nan responsabilidat den esaki.
Algun aspekto di e lei “no ta kumpli ku e normanan internashonal i ta violá e sentralidat ku Gobièrnu i FARC-EP a duna anteriormente na derechi di e víktimanan”, asina e organismo a spesifiká den su teksto, kaminda el a sita e kasonan di míles di agente di Estado i guerieronan ku tin mas di sinku aña detené i ku ta keda den libertat kondishonal sin e persiguimentu sufisiente.
