WASHINGTON, AP. – Salma Hayek a bisa ayera na e latinonan pa vota na fabor di e kandidato demókrata Hillary Clinton i a akusá su rival republikano Donald Trump di ta rasista i no kumbiniente pa e futuro di merikanonan.
“Nos tin di vota, nos tin di disidí ku nos pais ta importante i ku nos ta vota pasobra nos ta eksihí rèspèt pa e komunidat” asina e aktris mèksikano a bisa durante di un telekonferensia organisá pa e kampaña di Clinton.
“Nos komo latino tin di tene kuenta ku e poder ku nos tin. Nos tin di probechá e elekshonnan pa ehersé nos poder”.
E aktris a bisa mas aleu ku el a disidí di papia pa promé bes durante un kampaña polítiko merikano pasobra e ta kere ku un di e kandidatonan no solamente ta kiboká pero e ta ademas peligroso.
“Mi ta hopi preokupá ku e ta un persona rasista. No solamente kontra latinonan. I ora e papia malu di mèksikanonan, kere mi ku e ta papia di tur latino”, asina el a agregá.
Trump ta gosa di poko popularidat entre e votadónan latino for i ora el a yama e imigrantenan mèksikano kriminal, ora el a lansa su mes komo kandidato na yüni 2015.
