BOGOTA, AP.- Presidente kolombiano Juan Manuel Santos a sigurá djamars ku e no tabata sa ku Odebrecht a duna sèn di manera iregular pa su kampaña na 2010. Asina esun eks responsabel di e ekipo elektoral di e mandatario a indiká.
“Mi ta lamentá i pidi diskulpa na e kolombianonan pa e echo aki ku nunka mester a pasa i di loke mi a kaba di haña sa”, asina Santos a deklará den un video kaminda el a pidi pa investigá e skandal.
Roberto Prieto, su eks hefe di kampaña a bisa djamars na Blu Radio ku e konsturktor brasilero a paga 400.000 dòler na un bendedó pa prent 2 mion poster pa e kampaña. Sinembargo, el a sigurá ku Santos no tabatin konosementu di e iregularidatnan.
“Mi no a outorisá, ni mi no tabatin konosementu di e asuntunan aki, kual ta un violashon direktor di normanan étiko i di kontrol”, segun Santos a afirmá riba su kuenta di Twitter.
E ta ilegal pa empresanan na Colombia kontribuí den kampañanan presidensial i e notisia a kai manera un bòm pa gobièrnu. Den e dos último lunanan vários testimonio a mustra ku Santos a probechá di e sobornonan di Odebrecht pa finansiá su kampaña di 2010 i e karera pa reelekshon den 2014.
Siman pasá, un firma di enkuesta ku a traha pa reelekshon di Santos a afirmá di a risibí un mion dòler di e kompania brasilero. Prieto a wòrdu akusá di a risibí fondonan iregular pa un senador enkarselá pa su vínkulonan ku Odebrecht.
