COPENHAGEN, DINAMARKA (AFP).- Tres persona a keda detené ayera na Dinamarka i unu mas na Hulanda, bou di sospecho di a plania un proyekto di atentado terorista, segun servisionan di inteligensia danes.
Segun Israel, e sospechosonan detené na Dinamarka tabata vinkulá ku e movementu islamita palestino Hamas. Di su parti, Alemania a anunsiá detenshon di kuater supuesto miembro di Hamas, un di nan na Hulanda, sospechoso di a plania “posibel atentadonan kontra institushonnan hudiu na Europa”.
E kuater hòmbernan a keda akusá di a reuní arma prinsipalmente na Berlin pa kometé posibel atentadonan.
Den un konferensia di prensa ayera, outoridatnan di Dinamarka a indiká ku e detenshonnan ta relashoná ku “un grupo ku tabata preparando un akto di terorismo”.
“Tin relashon ku paisnan estranhero” i krímen organisá, segun e direktor di servisionan di inteligensia danes, Flemming Drejer.
Ademas, di e arestonan aki, el a trese dilanti ku tin mas persona impliká den ekstranhero, pero no a bai den detaye.
Pa e promé minister danes, Mette Frederiksen, e operashonnan polisial aki “ta mustra e situashon den kua nos ta den Dinamarka. “Pa basta aña kaba nos a konstatá ku tin hende ta biba aki pero ku no ke nos bon, ku nan ta kontra di nos demokrasia, nos libertat i ku nan ta kontra dje sosiedat danes”, el a deklará na prensa.
E servisionan di inteligensia ta konsiderá komo kritiko e menasa terorista i ta situá esaki na nivel kuater riba un eskala di sinku.
Dinamarka i su bisiña Suesia resien a krea rabia den paisnan musulman pa manera sin rèspèt pa trata coran. For di despues di esei, Dinamarka a legislá pa prohibí pa kima e buki santu di islam, ku e argumento ku esei ta pa protehá seguridat nashonal.