CARACAS, AP.- Ku e urgensia pa habri kaminda i organisá elekshon presidensial mas pronto posibel, Asamblea Nashonal venezolano, enkabesá pa lider opositor Juan Guaidó, a reuní djamars pa skohe organismonan elektoral nobo pa garantisá un elekshon liber i hustu.
Kongreso lo debatí e kondishonnan pa garantisá un ‘elekshon hustu’ na momentu ku Nicolás Maduro baha di su puesto.
Guaidó a deklará su mes komo presidente interino di Venezuela riba 23 di yanüari. El a indiká ku Maduro ta okupando su segundo mandato di seis aña, despues di elekshon ku mayoria a konsiderá komo ilegal. Maduro a bisa ku e elekshon tabata hustu i ta akusá Merka, Union Europeo i mayoria pais latinoamerikano di organisá un golpe di Estado.
E diputado opositor Juan Pablo Guanipa a papia tokante e nesesidat pa e pais realisá elekshon mas pronto ku ta posibel. Apesar di esaki, el a atmití ku konstitushon ta bisa ku e presidente interino mester realisá elekshon un luna despues di okupá e puesto, pero “nos tur sa ku ta imposibel pa un elekshon tuma lugá dentro di 30 dia”.
E debate ta kuminsá un dia despues ku vários pais di Union Europeo a sostené Guaidó públikamente. E paisnan a duna Maduro un ultimatum di pa realisá elekshon, i esaki a kulminá riba djadumingu. Guaidó tin sosten di otro paisnan den e region, inkluyendo esnan ku no ta pertenesé na Union Europeo.
E preshon ta keda fuerte den Latinoamérika tambe. Presidente kolombiano Ivan Duque a papia tokante e bentahanan pa Venezuela realisá un elekshon. Esaki lo benefisiá e pais venezolano i tambe esun di dje.
“Si demokrasia wòrdu restourá, esaki lo habri un merkado di mas di 7 mion dòler ku Colombia a pèrdè”.
Asamblea Nashonal venezolano mester papia tokante e distribushon di yudansa humanitario na e pais.
E promé ‘zending’ lo drenta via e siudat kolombiano di Cucuta i via e frontera ku Brasil, apesar di un rechaso fuerte di Maduro i Tribunal Supremo di Hustisia. E organismo ta sostené u yudansa internashonal ta kontra konstitushon.
