WASHINGTON, MERKA, AFP.- E Organisashon Panamerikano di Salú (OPS) a bisa djamars ku e yegada di wenter oustraliano i e temporada di orkan pa parti nort di e hemisferio por difikultá e lucha kontra covid-19 den e kontinente amerikano.
“Miéntras nos region ta traha kohuntamente pa kontené e propagashon di Covid-19, nos mester kuminsá plania pa un desafio formidabel ku por empeorá nos situashon kual ta klima”, asina e direktor di OPS Carissa Etienne a bisa den un rueda di prensa.
E region di Amérika tin kasi mitar di e 7,1 mion kasonan i 406.000 morto globalmente. Merka ta e pais ku mas infekshon mundialmente ku Brasil na terser lugá.
Etienne a bisa ku no tin dato ku ta indiká ku e temperatura òf humedat ta influensia propagashon di e coronavirus nobo, pero tin prueba ku e situashon ta oumentá infekshonnan ku halamentu di rosea, inkluyendo grip i pulmonia.
Esaki ta generá problema pa e pueblo, kual ta kore un rísiko grandi di infekshon grave di covid-19 i tambe pa e sistemanan di salú, kual mester atendé ku e pandemia i tambe akapará pashèntnan ku problema ku halamentu di rosea ku e klima por trese kuné, i afektá e proseso pa diagnostiká e vírus korektamente.
