PARIS, AP.- E direktora nobo di Unesco Audrey Azouley a lamentá e salida di Merka di e organisashon pero a sigurá ku e ousensia ei no ta sostenibel pa un plaso largu. Azoulay kende lo huramentá ofisialmente djaluna a bisa ku e salida di Merka no tabata un sorpresa si mira e posishon kritiko ku Washington a tuma den tempunan resien pa ku e organisashonnan mundial.
Despues di a keda konfirmá djabièrnè ku e ta e direktora nobo, Azoulay a rekonosé ku e organisashon di nashonnan uni pa edukashon, siensia i kultura tin su problemanan, entre nan e ousensia di Washington ku a retirá su finansiamentu na 2011 ora a permití Palestina komo miembro.
Sin embargo, Azoulay di 45 aña di edat i eks minister di kultura di Fransia, a bisa na The Associated Press den un entrevista ku e anunsio di gobièrnu di Donald Trump ku e ta sali di e organismo no ta pa tempu largu.
“Opviamente mi ta lamentá su retiro…pero e polítika di stul bashí no ta sostenibel pasobra Merka ta sigui keda afektá pa tur loke Unesco ta hasi”, asina Azoulay a bisa na e sede di e agensia na Paris.
Unesco ta mas rekonosé pa su programa di protekshon di lugánan manera patrimonio kultural di humanidat pero tambe e tin programanan pa lucha kontra ekstremismo violento, mehorá edukashon di muchanan, promové e memoria di Holocausta, defendé e libertat di prensa i fomentá e entendimentu riba kousanan di kambio klimatológiko.
Azoulay a primintí na tene e kanalnan di komunikashon habri ku Merka ku pa awor ta sigui ta un opservadó permanente di e institushon. Merka a stòp di duna finansiamentu na Unesco despues di e aprobashon di Palestina komo miembro na 2011 pero e departamento di estado ta mantené un representashon den e organismo i a partisipá den deliberashonnan priva. Aktualmente Merka tin un debe di 550 mion dòler na e organisashon pa falta di pago di su kuotanan.
