SAN DIEGO, AP.- E gobièrnu a para detenshon di personanan ku pidi asilo despues di krusa frontera ilegalmente, pero e servisio di inmigrashon no solamente ta keda sin detené nan, pero ta liber nan mas rápido posibel tambe debí ku no tin e kondishonnan apropiá pa akohé nan miéntras ta realisá e trámitenan.
Gobièrnu ta liberando e migrantenan desde final di òktober kousando ku nan no ta haña sufisiente tempu pa nan traha un plan di biahe. Mayoria famia mester paresé den korte sin ku e trámitenan nesesario a wòrdu hasí. Frekuentemente nan ta terminá den refugio di organisashonnan karitativo òf nan ta wòrdu lagá na terminalnan di bùs den siudatnan na frontera.
Desde California te na Arizona i Texas, boluntarionan ta purba yuda e famianan aki te na momentu nan logra topa ku nan pariente den diferente parti di e pais. Rapid Response Network di San Diego, un koalishon di aktivista ku ta atministrá un refugio a yuda mas di 4.000 persona desde òktober aña pasá.
Servisio di Inmigrashon i Kontrol di Duana (ICE) normalmente ta hasi tur koordinashon nesesario ku e refugionan.
E estado aktual di e situashon ta kontradesí afirmashon di presidente Donald Trump, na momentu ku el a afirmá e polítika di “kaptura i liberá komo un término opsoleto. Awor esaki a bira kaptura i detené”.